سابق وفاقی وزیر علی امین گنڈاپور گرفتار
تحریک انصاف کے رہنما علی امین گنڈا پور نے پولیس کو گرفتاری دے دی۔
تحریک انصاف کے رہنما نے دھمکی آمیز آڈیو جاری کی تھی اور عمران خان کی گرفتاری کی صورت میں اسلام آباد پر قبضے کی دھمکی دی تھی، پولیس کو بھی دھمکایا تھا۔
علی امین گنڈا پور نے پشاور ہائی کورٹ ڈیرا اسماعیل خان بینچ کے گیٹ پر گرفتاری دی، اس سے پہلے انہوں نے گرفتاری سے مسلسل انکار کیا تھا۔
سابق وفاقی وزیر کو ہائی کورٹ کی رجسٹری کے باہر سے پولیس نے حراست میں لیا، تحریک انصاف کے رہنما نے گرفتاری سے بچنے کیلئے احاطہ عدالت میں پناہ لے رکھی تھی، سابق وفاقی وزیر کی گرفتاری کیلئے پولیس کی بھاری نفری صبح سے ہی ہائی کورٹ کے باہر موجود رہی، تحریک انصاف کے رہنما کو کس کیس میں گرفتار کیا گیا ہے ابھی یہ نہیں بتایا جا رہا۔
علی امین گنڈا پور تمام مقدمات میں ضمانت حاصل کر چکے تھے، پولیس کی جانب سے انہیں عدالت میں حاضری سے روکا جا رہا تھا، سابق وفاقی وزیر آج دن ڈیڑھ بجے عدالت پہنچے تو جج کچھ دیر پہلے جا چکے تھے، ڈی پی او نے پولیس کی بھاری نفری کے ساتھ ہائیکورٹ کے احاطے کو گھیرے میں لئے رکھا، علی امین گنڈا پور نے خود کو پولیس کے حوالے کر دیا۔