وفاقی وزیر اطلاعات کی گاڑی کے قریب ہوائی فائرنگ کرنے والا ملزم گرفتار
ڈیفنس اے کی حدود میں وفاقی وزیر اطلاعات عطا اللہ تارڑ کی گاڑی کے قریب ہوائی فائرنگ کرنے والے کار سوار نوجوان کو پولیس نے اسلحہ اور گاڑی سمیت گرفتار کرلیا ہے۔
پولیس حکام کے مطابق یہ واقعہ گزشتہ رات پیش آیا جہاں ملزم نے وفاقی وزیر کی گاڑی کو اوورٹیک کرتے ہوئے ہوائی فائرنگ کی۔ واقعے کے بعد پولیس نے سیف سٹی اتھارٹی اور جدید ٹیکنالوجی کی مدد سے ملزم کو فوری ٹریس کر کے حراست میں لیا اور اس کے زیر استعمال گاڑی بھی تحویل میں لے لی۔
اس حوالے سے گفتگو کرتے ہوئے وفاقی وزیر اطلاعات عطا اللہ تارڑ نے بتایا کہ وہ اپنے اہل خانہ کے ساتھ جارہے تھے کہ ایک گاڑی نے بائیں جانب سے انہیں کراس کیا اور نوجوان نے 5 فائر کیے۔ انہوں نے مزید واضح کیا کہ نوجوان نے انہیں ٹارگٹ کر کے فائرنگ نہیں کی تھی بلکہ یہ محض ہوائی فائرنگ کا واقعہ تھا، جس پر پولیس قانون کے مطابق اپنی کارروائی عمل میں لا رہی ہے۔