بیلسٹک میزائل سے متعلق دہرا معیار نہیں ہونا چاہیے،
وزیراعظم اور ایرانی صدر کی پریس کانفرنس، مشترکہ امن کوششوں کا اعادہ
اسلام آباد: وزیراعظم شہباز شریف نے ایران کے بیلسٹک میزائل پروگرام کا بھرپور دفاع کرتے ہوئے عالمی سطح پر رائج دہرے معیار پر کڑی تنقید کی ہے۔ ایرانی صدر مسعود پزشکیان کے ہمراہ ایک مشترکہ پریس کانفرنس سے خطاب کرتے ہوئے وزیراعظم نے سوال اٹھایا کہ اگر دنیا کے دیگر ممالک اپنے دفاع کے لیے میزائل ٹیکنالوجی رکھ سکتے ہیں، تو ایران کے اس حق پر اعتراض کیوں اٹھایا جاتا ہے؟ انہوں نے واضح کیا کہ بیلسٹک میزائل کا معاملہ کبھی بھی کسی مذاکراتی ایجنڈے کا حصہ نہیں رہا۔
امن دشمنوں کے خلاف آہنی دیوار بنیں گے
وزیراعظم کا کہنا تھا کہ کچھ عناصر خطے میں امن کی کوششوں کو سبوتاژ کرنا چاہتے ہیں، تاہم پاکستان اور ایران کا یہ پختہ عزم ہے کہ وہ اس معاہدے کو خراب کرنے والوں کے سامنے آہنی دیوار کی طرح کھڑے ہوں گے۔ انہوں نے یقین دلایا کہ پاکستان ایک پائیدار امن معاہدے کے حصول تک اپنا کلیدی کردار ادا کرتا رہے گا۔ وزیراعظم نے جنگ بندی اور مفاہمت کی یادداشت (MoU) کے لیے فیلڈ مارشل سید عاصم منیر کی ان تھک محنت اور کوششوں کو بھی سراہا۔ اس کے علاوہ انہوں نے اس امن اقدام کی حمایت پر سعودی عرب کے ولی عہد، قطر کے امیر، ترکیہ اور مصر کی قیادت کا خصوصی شکریہ ادا کیا۔
میزائل پروگرام پر کوئی سمجھوتہ نہیں ہوگا، پاک ایران تعلقات یک جان دو قالب ہیں: ایرانی صدر
دوسری جانب ایرانی صدر مسعود پزشکیان نے دوٹوک الفاظ میں اپنے عزم کا اظہار کرتے ہوئے کہا کہ ایران اپنے میزائل پروگرام پر کسی بھی صورت یا دباؤ میں سمجھوتہ نہیں کرے گا۔ انہوں نے امن عمل کے لیے پاکستانی قیادت اور فیلڈ مارشل کی کوششوں کی تعریف کی اور قطر، ترکیہ، سعودی عرب اور مصر کا شکریہ ادا کیا۔ ایرانی صدر نے دونوں ممالک کے تاریخی روابط کا ذکر کرتے ہوئے کہا کہ پاک ایران تعلقات منفرد نوعیت کے ہیں اور دونوں ممالک ایک مشترکہ مستقبل کے شراکت دار ہونے کے ساتھ ساتھ ‘یک جان دو قالب’ ہیں۔
ایرانی صدر ڈاکٹر مسعود پزشکیان کے لیے اعزازی فیلوشپ
اس تاریخی دورے کے موقع پر ایک خصوصی تقریب کا انعقاد بھی کیا گیا جہاں ایرانی صدر ڈاکٹر مسعود پزشکیان کو ان کی شاندار خدمات کے اعتراف میں ‘پاکستان کالج آف فزیشنز اینڈ سرجنز’ کی جانب سے اعزازی فیلوشپ سے نوازا گیا۔ اس باوقار تقریب میں وزیراعظم شہباز شریف اور فیلڈ مارشل سید عاصم منیر نے بھی شرکت کی اور ایرانی صدر کو فیلوشپ پیش کی۔