قطر نے آبنائے ہرمز میں آئل ٹینکر پر حملے کا ذمہ دار ایران کو قرار دیدیا
قطر کا آبنائے ہرمز میں قطری آئل ٹینکر پر حملے کا ذمہ دار ایران کو ٹھہرانے کا اعلان
قطر نے آبنائے ہرمز سے گزرنے والے اپنے آئل ٹینکر “الرکيات” پر ہونے والے حملے کی سخت الفاظ میں مذمت کرتے ہوئے اس کی تمام تر ذمہ داری ایران پر عائد کر دی ہے۔
قطری وزارت خارجہ کے ترجمان ڈاکٹر ماجد بن محمد الانصاری نے سوشل میڈیا پلیٹ فارم ایکس (ٹویٹر) پر جاری ایک بیان میں کہا کہ قطری ٹینکر کو نشانہ بنانا بین الاقوامی بحری جہاز رانی، عالمی توانائی کی فراہمی اور علاقائی سلامتی کے خلاف ایک ناقابل قبول جارحیت ہے۔
ترجمان نے واضح کیا کہ یہ حملہ بین الاقوامی قوانین اور خاص طور پر عالمی آبی گزرگاہوں میں آزادانہ اور محفوظ بحری آمدورفت کے اصولوں کی کھلی خلاف ورزی ہے۔
قطر نے ایران سے مطالبہ کیا ہے کہ وہ فوری طور پر ایسے تمام اقدامات سے گریز کرے جو خطے کے امن، بین الاقوامی بحری راستوں اور عالمی سطح پر ایندھن کی سپلائی کے لیے خطرے کا باعث بن رہے ہیں، کیونکہ قطر اس حملے اور اس کے نتیجے میں ہونے والے نقصانات کا مکمل ذمہ دار ایران کو سمجھتا ہے۔