اسرائیل اور حزب اللہ کے درمیان لبنان میں جنگ بندی پر اتفاق
امریکا ایران معاہدے کے بعد اسرائیل اور حزب اللہ کے درمیان لبنان میں جنگ بندی پر اتفاق ہو گیا۔
برطانوی خبر ایجنسی کے مطابق جنگ بندی آج شام مقامی وقت کے مطابق 4 بجے شروع ہو گی، معاہدے میں امریکا، قطر اور ایران نے اہم کردار ادا کیا۔
خبر ایجنسی کے مطابق سینئر امریکی اہلکار نے جنگ بندی معاہدے کی تصدیق کر دی، معاہدے کے تحت خطے میں تمام محاذوں پر فوجی کارروائیاں روکنے کا فیصلہ کیا گیا ہے۔
برطانوی خبر ایجنسی کے مطابق اسرائیل حزب اللہ جنگ بندی کے بعد خطے میں کشیدگی میں کمی کا امکان ہے، ایران نے حزب اللہ کو جامع جنگ بندی پر عملدرآمد کا پیغام دیا۔خبر ایجنسی کے مطابق لبنان میں کشیدگی نے امریکا ایران معاہدے کو خطرے میں ڈال دیا تھا، لبنان میں رات بھر اسرائیلی حملوں میں 18 افراد جاں بحق ہوئے۔
برطانوی خبر ایجنسی کے مطابق حزب اللہ کے حملے میں 4 اسرائیلی فوجی بھی مارے گئے۔
امریکا نے نہیں بلکہ ایران نے مایوسی میں معاہدہ کیا: ٹرمپ
امریکی صدر ڈونلڈ ٹرمپ کا کہنا ہےکہ امریکا نے ایران سے معاہدہ مایوسی میں نہیں کیا بلکہ ایران نے ایسا کیا ہے ، ایران مکمل طورپر ختم ہوچکا ہے، ہم 60 دن کا وقت پورا کریں گے اور ایران کو کوئی رقم، ایک پیسہ بھی نہیں ملےگا۔
ٹرمپ نے کہا جنگ نے ایران کو کمزور کر دیا ہے، ایران کے پاس نہ فضائیہ ہے، نہ بحریہ، نہ طیارہ شکن آلات، نہ ریڈار اور نہ ہی عملی طور پر کوئی اور چیز باقی ہے، اس کے باوجود ڈیموکریٹس کہتے ہیں کہ ایران 4 ماہ قبل کے مقابلے اب بہتر حالت میں ہے، ڈیموکریٹس کتنے بیوقوف ہو سکتے ہیں۔
ایران کی جانب سے آبنائے ہرمز کی بندش کی اطلاعات میں کوئی صداقت نہیں: ایرانی وزارت خارجہ
ایرانی وزارت خارجہ نے کہا کہ ایران کی جانب سےآبنائے ہرمز کی بندش کی اطلاعات میں کوئی صداقت نہیں ہے۔
ایرانی وزارت خارجہ کے مطابق حتمی معاہدے کے لیے مذاکرات کا اگلا دور شروع کرنے پر ثالثوں کے ذریعے مشاورت کا عمل جاری ہے۔