ملک میں ہونے والی دہشتگردی میں مشرقی ہمسائے کا ہاتھ ہے،وزیراعظم
وزیراعظم شہباز شریف کی زیرِ صدارت کوئٹہ میں نیشنل ایکشن پلان کی صوبائی اپیکس کمیٹی کا اہم اجلاس منعقد ہوا، جس میں فیلڈ مارشل سید عاصم منیر، گورنر اور وزیراعلیٰ بلوچستان سمیت وفاقی وزرا نے شرکت کی۔ اجلاس سے گفتگو کرتے ہوئے وزیراعظم نے واضح کیا کہ ملک میں ہونے والی دہشت گردی کی کارروائیوں میں پاکستان کا مشرقی ہمسایہ ملک بھرپور طریقے سے ملوث ہے، جو دہشت گردوں کو اسلحہ، مالی معاونت اور دیگر سہولیات فراہم کر رہا ہے۔ انہوں نے کہا کہ دہشت گرد افغان سرزمین کا استعمال کرتے ہوئے خیبر پختونخوا اور بلوچستان میں بزدلانہ حملے کر رہے ہیں، لیکن ریاست ان کے مذموم عزائم کو ہر صورت ناکام بنائے گی۔
وزیراعظم نے حالیہ دنوں میں ہونے والے دہشت گردی کے سنگین واقعات پر گہرے دکھ کا اظہار کیا، جن میں پولیس، پاک فوج کے جوان اور عام شہری شہید ہوئے۔ انہوں نے بتایا کہ سیکیورٹی فورسز کی مختلف کارروائیوں کے دوران 54 دہشت گردوں کو جہنم واصل کیا جا چکا ہے اور آخری فسادی کے خاتمے تک یہ جنگ بلاامتیاز جاری رہے گی۔ شہباز شریف نے مسلح افواج کے افسران اور جوانوں کی لازوال قربانیوں کو خراجِ تحسین پیش کرتے ہوئے کہا کہ پوری قوم اپنی بہادر افواج کے ساتھ کھڑی ہے۔ انہوں نے عزم ظاہر کیا کہ پاکستان کی سیاسی و عسکری قیادت دہشت گردی کے جڑ سے خاتمے کے لیے مکمل متحد ہے اور اس فتنے کو ختم کرنے کے لیے تمام دستیاب وسائل بروئے کار لائے جائیں گے۔