ٹرمپ کا ایران کے خلاف اب تک کی شدید ترین معاشی جنگ کا اعلان
امریکی صدر ڈونلڈ ٹرمپ نے اپنے سوشل میڈیا پلیٹ فارم ‘ٹروتھ سوشل’ پر جاری ایک ہنگامی بیان میں ایران کے خلاف اب تک کی سب سے تباہ کن اور غیر معمولی معاشی کارروائی کا اعلان کر دیا ہے۔ امریکی صدر نے دنیا بھر کے ممالک اور عالمی اداروں کو سخت لہجے میں خبردار کیا ہے کہ وہ تیل کی اسمگلنگ سمیت ایران کے ساتھ ہر قسم کے معاشی اور مالیاتی تعلقات فوری طور پر ختم کر لیں، ورنہ انہیں شدید اقتصادی نتائج اور سنگین پابندیوں کا سامنا کرنا پڑے گا۔
صدر ٹرمپ نے اپنے بیان میں واضح کیا کہ جو بھی ملک، مالیاتی ادارہ، کاروبار، ہوائی اڈہ یا حکومتی ادارہ ایران کے لیے کسی بھی نوعیت کی “لائف لائن” بنے گا، اس کے خلاف سخت ترین اقدام کیا جائے گا۔ انہوں نے عالمی برادری سے مطالبہ کیا ہے کہ تیل کی غیر قانونی اسمگلنگ، کیش منتقلی، تبادلے، شپ registries اور فرنٹ کمپنیوں کے شبکوں کو بلا تاخیر روکا جائے۔ ٹرمپ نے اس کارروائی کو ایران کے لیے “اقتصادی ڈی ڈے” قرار دیتے ہوئے کہا کہ ایران کو ماضی میں ڈیل کے بہترین مواقع دیے گئے لیکن وہ ان سے فائدہ اٹھانے میں ناکام رہا، جس کے بعد اب اسے عالمی سطح پر مکمل طور پر تنہا کر دیا جائے گا۔
اپنے بیان میں امریکی صدر نے دعویٰ کیا کہ ایران کی فضائیہ اور بحریہ کو تباہ کر دیا گیا ہے جبکہ اس کی فوجی فیکٹریوں کو ملبے کا ڈھیر بنا دیا گیا ہے۔ انہوں نے کہا کہ ایرانی کرنسی اپنی قدر کھو چکی ہے اور ملک انتہائی نازک موڑ پر ہے، اور ان تاریخی اقدامات کا مقصد ایران کو مفلوج کرنا ہے تاکہ وہ نہ تو دنیا میں دہشت پھیلا سکے اور نہ ہی کبھی ایٹمی ہتھیار حاصل کر سکے۔
خبر ایجنسی کے مطابق، امریکی صدر نے یہ واضح نہیں کیا کہ ایران کی معاشی مدد کرنے والے ممالک کے خلاف کون سے مخصوص اقدامات کیے جائیں گے اور نہ ہی انہوں نے فی الحال کسی مخصوص ملک کا نام لیا ہے، تاہم اس اعلان کے بعد عالمی سیاسی اور معاشی حلقوں میں شدید تشویش لہر دوڑ گئی ہے۔