فیفا ورلڈکپ : بیلجیئم اور ایران کامقابلہ بغیر کسی گول کے ڈرا ہوگیا
فیفا ورلڈکپ 2026 کے گروپ جی کے ایک انتہائی اہم اور سنسنی خیز مقابلے میں بیلجیئم اور ایران کی ٹیمیں مدمقابل آئیں، جو مقررہ وقت تک بغیر کسی گول کے برابر رہا۔ لاس اینجلس اسٹیڈیم میں کھیلے گئے اس میچ کا آغاز دونوں ٹیموں کی جانب سے انتہائی جارحانہ انداز میں ہوا۔ میچ کے پہلے ہاف میں ایران کی ٹیم کو سبقت ملنے کا واضح امکان تھا جب 28ویں منٹ میں ایک بہترین فری کک پر گیند بیلجیئم کے جال میں چلی گئی، تاہم ریفری نے ایرانی کھلاڑی کو آف سائیڈ قرار دیتے ہوئے اس گول کو مسترد کر دیا۔
میچ میں اگرچہ بیلجیئم کی ٹیم کا پلہ مجموعی طور پر بھاری رہا، لیکن ایران کے دفاعی کھلاڑیوں اور خاص طور پر ان کے گول کیپر علی رضا نے شاندار کارکردگی دکھائی۔ علی رضا نے میچ کے دوران کئی یقینی گول بچائے، خصوصاً دوسرے ہاف میں بیلجیئم کے ایک خطرناک حملے کو جس مہارت سے ناکام بنایا، اسے فٹبال ماہرین نے ٹورنامنٹ کا بہترین ڈیفنس یعنی “سیو آف دی ٹورنامنٹ” قرار دیا ہے۔ دوسری جانب بیلجیئم کے تجربہ کار گول کیپر کورٹوا نے بھی اپنی مہارت کا لوہا منوایا اور ایرانی فارورڈز کو گول کرنے کا کوئی موقع نہ دیا۔
میچ کے دوسرے ہاف میں اس وقت ایک نیا موڑ آیا جب ایک خطرناک فاؤل کرنے پر ریفری نے بیلجیئم کے کھلاڑی کو ریڈ کارڈ دکھا کر میدان سے باہر کر دیا، جس کے بعد بیلجیئم کی ٹیم کو بقیہ میچ صرف 10 کھلاڑیوں کے ساتھ کھیلنا پڑا۔ اس دباؤ کے باوجود ایرانی ٹیم فائدہ نہ اٹھا سکی اور میچ صفر صفر سے برابر ختم ہوا۔ اس ڈرا کے نتیجے میں دونوں ٹیموں کو ایک ایک پوائنٹ ملا ہے، اور ٹورنامنٹ میں اپنے دونوں ابتدائی میچز ڈرا کرنے کے بعد اب دونوں کے مجموعی طور پر دو دو پوائنٹس ہو گئے ہیں۔