ایران امریکہ تکنیکی مذاکرات مکمل، 4 ورکنگ گروپس بنانے پر اتفاق
ایرانی سرکاری خبر رساں ایجنسی کے مطابق ایران اور امریکا کے درمیان سوئٹزرلینڈ میں ہونے والے تکنیکی مذاکرات مکمل ہو گئے جس میں جوہری امور اور پابندیوں سے متعلق آئندہ مرحلے کے لیے 4 ورکنگ گروپس تشکیل دینے پر اتفاق کیا گیا ہے۔
ایرانی میڈیا کے مطابق 4 ورکنگ گروپس قائم کیے جائیں گے جن میں پابندیوں کے خاتمے، جوہری امور، تعمیر نو اور اقتصادی ترقی، اور نگرانی و عملدرآمد کے شعبے شامل ہوں گے۔
مذاکرات میں 12 ارب ڈالر کے ایرانی اثاثے بھی بحال کرنے پر اتفاق
ایران کے اعلیٰ ترین مذاکرات کار اور پارلیمنٹ کے اسپیکر محمد باقر قالیباف نے اعلان کیا ہے کہ امریکہ کے ساتھ ایران کے 12 ارب ڈالر کے منجمد اثاثوں کو بحال کرنے کا معاہدہ طے پا گیا ہے۔ دوسری جانب امریکی صدر ڈونلڈ ٹرمپ کا کہنا ہے کہ یہ فنڈز خصوصی طور پر امریکی کسانوں سے مکئی، سویا بین اور دیگر غذائی اجناس خریدنے کے لیے استعمال کیے جائیں گے۔
تیل کی پابندیوں میں 60 روز کی نرمی
امریکی محکمہ خزانہ نے ایک اہم پالیسی تبدیلی کے تحت ایران کے لیے 60 روز کا ویور (صلاحیت نامہ) جاری کیا ہے، جس کے تحت ایران کو اپنا تیل اور پیٹرو کیمیکل مصنوعات مارکیٹ کی اصل قیمت پر بیچنے کی اجازت ہوگی۔ اب تک ایران پر عائد پابندیوں کے باعث اسے اپنا تیل بھاری ڈسکاؤنٹ پر فروخت کرنا پڑتا تھا، تاہم اب اس فیصلے سے ایرانی معیشت میں کروڑوں ڈالر آنے کی توقع ہے۔