راول ڈیم کے سپل ویز پیر صبح 6 بجے کھولنے کا فیصلہ
راول ڈیم کے سپل ویز پیر کی صبح 6 بجے کھولنے کا فیصلہ کر لیا گیا ہے۔ اسلام آباد میں مون سون بارشوں کے مسلسل سلسلہ کے باعث ڈیم میں پانی کی سطح میں نمایاں اضافہ ریکارڈ کیا گیا ہے اور یہ 1751.40 فٹ تک پہنچ چکی ہے۔ اس صورتحال کو مدنظر رکھتے ہوئے اسلام آباد کی ضلعی انتظامیہ نے اضافی پانی کے محفوظ اخراج کے لیے سپل ویز کھولنے کی منظوری دی ہے۔
ضلعی انتظامیہ کی جانب سے تمام متعلقہ شعبوں بالخصوص ریسکیو 1122 اور پولیس کو ہائی الرٹ پر رہنے کی سخت ہدایات جاری کی گئی ہیں تاکہ کسی بھی ممکنہ ایمرجنسی سے وقت پر نمٹا جا سکے۔ اس کے علاوہ انتظامیہ نے سپل ویز کھولنے کے عمل سے قبل تمام حفاظتی اور احتیاطی تدابیر مکمل کرنے کا حکم دیا ہے تاکہ علاقے میں جان و مال کے نقصان کا کوئی اندیشہ نہ رہے۔
دوسری طرف، انتظامیہ نے عوام الناس اور مقامی رہائشیوں سے اپیل کی ہے کہ وہ سپل ویز کے کھلنے کے دوران ندیاں، برساتی نالوں اور نشیبی علاقوں کے قریب جانے سے مکمل طور پر گریز کریں۔ شہریوں کو تاکید کی گئی ہے کہ کسی بھی ناخوشگوار واقعے سے بچنے اور اپنی حفاظت یقینی بنانے کے لیے انتظامیہ کی جاری کردہ تمام ہدایات پر لازمی عمل کریں۔