پنجاب اور کے پی کے مختلف شہروں میں زلزلے کے شدید جھٹکے، شدت 5.4 ریکارڈ
اسلام آباد (ویب ڈیسک): وفاقی دارالحکومت اسلام آباد، پنجاب اور خیبر پختونخوا کے مختلف اضلاع میں زلزلے کے شدید جھٹکے محسوس کیے گئے ہیں، جس کے باعث شہریوں میں خوف و ہراس پھیل گیا۔
زلزلہ پیما مرکز کے مطابق ریکٹر اسکیل پر زلزلے کی شدت 5.4 ریکارڈ کی گئی، جبکہ زمین میں اس کی گہرائی 215 کلومیٹر تھی۔ رپورٹ میں بتایا گیا ہے کہ زلزلے کا مرکز پڑوسی ملک افغانستان میں واقع ہندوکش کا پہاڑی سلسلہ تھا۔
متاثرہ علاقوں کی تفصیلات:
زلزلے کے جھٹکے وسیع پیمانے پر محسوس کیے گئے جن میں درج ذیل شہر اور ان کے گردونواح شامل ہیں:
-
خیبر پختونخوا (کے پی): پشاور، سوات، باجوڑ، بونیر، ہنگو، شانگلہ، کوہاٹ، مہمند اور شبقدر۔
-
پنجاب و دیگر علاقے: اسلام آباد، راولپنڈی، ڈیرہ اسماعیل خان (ڈی آئی خان) اور ملتان۔
عینی شاہدین کے مطابق زلزلے کے فوراً بعد لوگ کلمہ طیبہ کا ورد کرتے ہوئے گھروں اور دفاتر سے باہر کھلی جگہوں پر نکل آئے۔ ریسکیو ذرائع کے مطابق ابتدائی طور پر کسی جانی یا مالی نقصان کی اطلاع موصول نہیں ہوئی ہے۔