فیفا ورلڈ کپ 2026: فرانس نے پیراگوئے کو شکست دیکر کوارٹر فائنل میں جگہ بنالی
فیفا ورلڈ کپ 2026 کے دوسرے پری کوارٹر فائنل میں فرانس نے پیراگوئے کو سخت مقابلے کے بعد ایک صفر سے ہرا کر کوارٹر فائنل کے لیے کوالیفائی کر لیا ہے، جہاں اب اس کا مقابلہ مراکش سے ہوگا۔
فلاڈلفیا میں کھیلے گئے اس سنسنی خیز میچ کے پہلے ہاف میں پیراگوئے نے فرانسیسی ٹیم کا ڈٹ کر مقابلہ کیا۔ دونوں ٹیموں کی جانب سے ایک دوسرے کے گول پر بھرپور حملے کیے گئے لیکن کوئی بھی ٹیم گول کرنے میں کامیاب نہ ہو سکی۔ میچ کے دوران کھلاڑیوں کے درمیان گرما گرمی اور دھکم پیل بھی دیکھنے میں آئی، جس کے باعث پہلا ہاف بغیر کسی گول کے برابر رہا۔
دوسرے ہاف میں بھی دونوں ٹیمیں کافی دیر تک گول کرنے کی کوششوں میں مصروف رہیں۔ میچ کے 70 ویں منٹ میں فرانس کو اس وقت سنہری موقع ملا جب ڈی (D) کے اندر فرانسیسی کھلاڑی کو غلط طریقے سے گرایا گیا۔ ریفری نے وی اے آر (VAR) ٹیکنالوجی کی مدد لینے کے بعد فرانس کو پنالٹی ایوارڈ کی، جس پر اسٹار فٹبالر ایم باپے نے شاندار گول کر کے اپنی ٹیم کو سبقت دلا دی۔
میچ کے آخری لمحات اور 10 منٹ کے انجری ٹائم میں پیراگوئے نے واپسی کی بھرپور کوشش کی جبکہ فرانس نے بھی ایک خطرناک حملہ کیا جسے پیراگوئے کے گول کیپر نے ناکام بنایا۔ مقررہ وقت کے خاتمے پر فرانس نے ایک صفر کی برتری برقرار رکھتے ہوئے کوارٹر فائنل میں اپنی جگہ پکی کر لی۔