پاکستان کی افغانستان کے سرحدی علاقوں میں کارروائیاں، 29 دہشتگرد ہلاک
پاک فوج کے شعبہ تعلقات عامہ (آئی ایس پی آر) کے مطابق آپریشن ’’غضب للحق‘‘ کے تحت کامیاب کارروائیاں کی گئیں، باجوڑ میں انٹیلی جنس بیسڈ آپریشن میں 4 دہشت گردوں کو ہلاک کردیا گیا، مرنے والے دہشت گردوں میں ہائی ویلیو کمانڈر خان فروش عرف زبل اور بھارتی پراکسی جماعت الاحرار کے 3 دیگر دہشت گرد شامل ہیں۔
آئی ایس پی آر کا کہنا ہے جماعت الاحرار اور فتنہ الخوارج کے دہشت گردوں کے خلاف پکتیا، پکتیکا اور کنڑ میں کامیاب کارروائیاں کی گئیں جن میں 3 دہشت گرد مراکز تباہ ہوگئے جبکہ 25 خوارج ہلاک اور متعدد زخمی ہوگئے، کارروائیوں میں دہشت گردوں کے اسلحہ اور بارود کے ذخائر کو تباہ کردیا گیا۔
پاک فوج کے شعبہ تعلقات عامہ کے مطابق خیبرپختونخوا، بلوچستان اور کراچی کے حملوں کا بھرپور جواب دیا جارہا ہے، سکیورٹی فورسز نے غیرملکی سرپرستی میں دہشت گردی کے مکمل خاتمے کا عزم کیا ہے۔
وفاقی وزیر اطلاعات عطاتارڑ کے مطابق افغان صوبے پکتیا، پکتیکا اور کنڑ میں بھی کارروائی کی گئی جس میں 25 دہشت گرد مارے گئے، دہشت گردوں کے مراکز میں ذخیرہ کیاگیا بھاری تعداد میں اسلحہ و گولہ بارود بھی تباہ ہوگیا۔
عطاتارڑ نے کہا کہ آپریشن عزم استحکام کے تحت دہشت گردوں اور فتنۃ الخوارج کے خلاف پاکستانی سکیورٹی فورسز کے آپریشن جاری ہیں۔
انہوں نے کہا کہ آپریشن تب تک جاری رہیں گے جب تک غیرملکی پیسےاور حمایت سے پاکستان میں دہشت گردی کی وارداتیں بند نہیں ہو جاتیں۔