سعودی عرب نے ایک سالہ ملٹی پل انٹری عمرہ ویزا متعارف کرادیا
سعودی حکومت نے زائرین کی سہولت کے لیے ایک سالہ ملٹی پل انٹری عمرہ ویزا متعارف کرا دیا ہے جس کے تحت اب ویزا ہولڈرز کو سال بھر میں متعدد بار عمرہ کرنے کی اجازت ہوگی۔
سعودی وزارت حج و عمرہ کے مطابق اس نئے ویزے کی میعاد 365 دن ہوگی جس کے دوران زائرین جتنی بار چاہیں سعودی عرب میں داخل ہو سکیں گے، تاہم ایک وقت میں ان کا مجموعی قیام 90 روز تک محدود رہے گا۔ نئے نظام کے تحت ہر نئے سفر سے قبل زائرین کو ‘نسک’ پلیٹ فارم سے منظور شدہ سروس پیکیج خریدنا اور اسی ایپ کے ذریعے عمرہ پرمٹ حاصل کرنا لازم ہوگا۔
سعودی حکام نے واضح کیا ہے کہ ہر بار ملک سے روانگی کے بعد یہ ویزا غیر فعال ہو جائے گا جسے اگلے سفر کے لیے مقررہ شرائط پوری کر کے دوبارہ فعال کیا جا سکے گا، جبکہ حج سیزن کے دوران یعنی یکم ذوالقعدہ سے 13 ذوالحج تک اس ویزے پر سفر کرنے کی اجازت نہیں ہوگی۔