ایس اینڈ پی گلوبل نے پاکستان کی طویل المدتی کریڈٹ ریٹنگ بہتر کردی
بین الاقوامی کریڈٹ ریٹنگ ایجنسی ایس اینڈ پی گلوبل نے پاکستان کی طویل المدتی خودمختار کریڈٹ ریٹنگ ’بی مائنس‘ سے بڑھا کر ’بی‘ کر دی ہے اور مستقبل کا منظرنامہ مستحکم قرار دیا ہے۔
ایجنسی کے مطابق یہ پیشرفت ملک میں جاری معاشی اصلاحات، آئی ایم ایف کے ساتھ بہتر تعاون، اور ادارہ جاتی صلاحیت میں بہتری کا نتیجہ ہے۔
معاشی اقدامات کی بدولت پاکستان کے مالیاتی نظام میں بہتری اور زرمبادلہ کے ذخائر میں نمایاں اضافہ ریکارڈ کیا گیا ہے، جس کے باعث معاشی نمو میں تسلسل کی توقع ظاہر کی گئی ہے۔
اس اپ گریڈ کے ساتھ ہی پاکستان کی کریڈٹ ریٹنگ تقریباً آٹھ سال کی بلند ترین سطح پر پہنچ گئی ہے، جبکہ قلیل المدتی کریڈٹ ریٹنگ کو ’بی‘ کی سطح پر برقرار رکھا گیا ہے۔