فلپائن میں قیامت خیز زلزلہ، ہلاکتوں کی تعداد 41 ہو گئی
فلپائن کے جنوبی جزیرے مینڈاناؤ کے قریب آنے والے 7.8 شدت کے انتہائی طاقتور زلزلے نے بڑے پیمانے پر تباہی مچائی ہے، جس کے نتیجے میں اب تک ہلاکتوں کی تعداد بڑھ کر 41 ہو گئی ہے۔ بین الاقوامی میڈیا اور مقامی حکام کے مطابق، زلزلے کے شدید جھٹکوں کے باعث مختلف حادثات اور عمارتیں گرنے سے 450 سے زائد افراد زخمی ہوئے ہیں جنہیں قریبی ہسپتالوں میں طبی امداد فراہم کی جا رہی ہے۔
زلزلے کی گہرائی زمین میں صرف 10 کلومیٹر ریکارڈ کی گئی
کم گہرائی ہونے کی وجہ سے سطح زمین پر جھٹکوں کی شدت انتہائی ہولناک تھی جس نے رہائشی اور کاروباری عمارتوں کو شدید نقصان پہنچایا اور کئی ڈھانچے ملبے کا ڈھیر بن گئے۔
متاثرہ علاقوں میں ریسکیو آپریشن شروع کردیا گیا
زلزلے کے فوراً بعد مقامی انتظامیہ اور امدادی ٹیموں نے بڑے پیمانے پر ریسکیو آپریشن شروع کر دیا ہے۔ شدید متاثرہ علاقوں سے اب تک 10,000 سے زائد افراد کو نکال کر محفوظ مقامات اور عارضی پناہ گاہوں میں منتقل کیا جا چکا ہے۔ حکام کا کہنا ہے کہ ملبے تلے دبے افراد کو نکالنے کے لیے کوششیں تیز کر دی گئی ہیں، تاہم اب بھی 4 افراد تاحال لاپتا ہیں جن کی تلاش کے لیے ریسکیو اہلکار مسلسل کام کر رہے ہیں۔
آفٹر شاکس کا سلسلہ شہریوں کو متاثرہ عمارتوں سے دور رہنے کی ہدایت
متاثرہ علاقوں میں آفٹر شاکس کا سلسلہ بھی وقفے وقفے سے جاری ہے، جس کی وجہ سے شہریوں کو مخدوش عمارتوں سے دور رہنے کی ہدایت کی گئی ہے۔