عمران خان کی ہسپتال منتقلی کے خلاف حکومتی درخواست اعتراض لگا کر واپس
سپریم کورٹ نے بانی پی ٹی آئی عمران خان کو شفا ہسپتال منتقل کرنے کے فیصلے کے خلاف حکومت کی جانب سے دائر کی گئی نظرثانی درخواست اعتراض لگا کر واپس کر دی ہے۔
ذرائع کے مطابق رجسٹرار آفس نے درخواست کے ساتھ پیپر بکس مکمل نہ ہونے کا اعتراض عائد کیا۔ یہ درخواست چیف کمشنر اسلام آباد نے ایڈووکیٹ جنرل کے توسط سے دائر کی تھی، جس کے بارے میں بتایا گیا ہے کہ رجسٹرار آفس کے اعتراضات دور کرنے کے بعد اسے دوبارہ دائر کیا جائے گا۔
واضح رہے کہ سپریم کورٹ نے بانی پی ٹی آئی کو علاج کے لیے شفا ہسپتال منتقل کرنے کا حکم دیا تھا، تاہم ان کی ہسپتال منتقلی پر عملدرآمد نہ ہونے کے بعد حکومت نے اس فیصلے پر نظرثانی کی اپیل کی تھی۔