ورلڈ کپ میں شرکت کے لیے قومی ہاکی ٹیم نیدرلینڈ روانہ ہو گئی
قومی ہاکی ٹیم ورلڈ کپ میں شرکت کے لیے لاہور کے علامہ اقبال انٹرنیشنل ایئرپورٹ سے نیدرلینڈز اور بیلجیم کے لیے روانہ ہو گئی ہے۔ 15 سے 30 اگست تک نیدرلینڈز اور بیلجیم میں کھیلے جانے والے ورلڈ کپ میں قومی ٹیم ایکشن میں نظر آئے گی۔
پاکستان ہاکی فیڈریشن (پی ایچ ایف) نے روانگی سے قبل کھلاڑیوں اور کوچز کو 2 کروڑ روپے کا فارن ڈیلی الاؤنس جاری کرتے ہوئے رقم ان کے اکاؤنٹس میں منتقل کر دی ہے۔
پی ایچ ایف کے صدر محی الدین وانی کا کہنا ہے کہ کھلاڑیوں اور کوچز کی فلاح و بہبود کے پیش نظر تمام سفری، مالی اور لاجسٹک انتظامات مکمل کر لیے گئے ہیں اور قومی ٹیم ورلڈ کپ میں فتح اور عمدہ کارکردگی کا عزم لے کر میدان میں اترے گی۔