حکومت نے پیاز اور ٹماٹڑ کی درآمد کی اجازت دیدی
وفاقی وزارت تجارت نے سیلابی صورتحال کے باعث سبزیوں کی پیداوار متاثر ہونے اور مارکیٹ میں قلت کے پیش نظر پیار اور ٹماٹر کی درآمد کی اجازت دیدی۔
وفاقی وزارت تجارت کا اجلاس سیکریٹری تجارت کی زیر صدارت ہوا جس میں پیاز اور ٹماٹر کی درآمد کی اجازت دے دی گئی۔ اجلاس میں حالیہ بارشوں سے سبزیوں کی پیداوار متاثر ہونے اور مارکیٹ میں قلت کی صورتحال پر غور کیا گیا۔
اجلاس میں وزارت نیشنل فوڈ سیکیورٹی اور ایف بی آر کے اعلیٰ افسران، ایران، ترکی اور افغانستان کے سفارتی نمائندوں نے بھی شرکت کی۔
پاکستان فروٹ اینڈ ویجی ٹیبل امپورٹرز ایکسپورٹرز مرچنٹس ایسوسی ایشن نے فوری طور پر پیاز اور ٹماٹر کی درآمد پر ڈیوٹی اور ٹیکسز کے خاتمے کی تجویز دی، امپورٹرز نے مارکیٹ میں استحکام کیلئے 3 ماہ کی مدت کیلئے ڈیوٹی اور ٹیکسوں کی چھوٹ کی بھی سفارش کردی۔
اجلاس میں پی ایف وی اے نے بھارت سے بھی پیاز اور ٹماٹر درآمد کرنے کی اجازت مانگ لی، وفاقی حکومت نے بھارت سے پیاز اور ٹماٹر کی درآمد کی تاحال اجازت نہیں دی تاہم دیگر ملکوں سے پیاز اور ٹماٹر کی درآمد کیلئے منگل سے سودے طے ہونا شروع ہوں گے۔
رپورٹ کے مطابق سیلاب سے سندھ میں پیاز کی 80 فیصد سے زائد فصل تباہ ہوگئی، ٹماٹر کی فصلوں کو بھی شدید نقصان پہنچا ہے، بلوچستان میں پیاز کے سیزن کے دوران طوفانی بارش اور سیلاب سے کی فصل کو شدید نقصان پہنچا۔