ہیڈنگلے ٹیسٹ: انگلینڈ نے پاکستان کو ایک اننگ، 103 رنز سے شکست دے دی
لیڈز میں کھیلے گئے تین ٹیسٹ میچوں کی سیریز کے پہلے میچ میں انگلینڈ نے پاکستان کے خلاف عبرتناک فتح حاصل کرتے ہوئے سیریز میں 0-1 کی برتری حاصل کر لی ہے۔ میچ میں انگلش ٹیم نے ٹاس جیت کر پہلے باؤلنگ کا فیصلہ کیا جو بالکل درست ثابت ہوا کیونکہ پاکستان کی پوری ٹیم پہلی اننگز میں صرف 171 رنز پر ڈھیر ہو گئی تھی۔
پاکستان کے معمولی اسکور کے جواب میں انگلینڈ کی بیٹنگ لائن نے شاندار کھیل کا مظاہرہ کیا اور پہلی اننگز میں 409 رنز کا بڑا اسکور کھڑا کر کے 238 رنز کی بھاری برتری حاصل کر لی۔ انگلینڈ کی جانب سے ہیری بروک نے 91، جارڈن کاکس نے 73، جو روٹ نے 66 اور ڈین لارنس نے 51 رنز کی نمایاں اننگز کھیلیں۔ پاکستان کی طرف سے باؤلنگ کرتے ہوئے علی عثمان نے 5 جبکہ خرم شہزاد نے 3 وکٹیں حاصل کیں۔
238 رنز کے بھاری خسارے کا شکار قومی ٹیم دوسری اننگز میں بھی انگلش باؤلنگ لائن کے سامنے ریت کی دیوار ثابت ہوئی۔ دوسری اننگز میں شان مسعود 29، عبداللہ شفیق 15، سعود شکیل 14، اذان اویس 9 اور خرم شہزاد 8 رنز بنا سکے جبکہ سلمان علی آغا 4 اور امام الحق بغیر کوئی رن بنائے آؤٹ ہو گئے۔ پوری ٹیم دوسری اننگز میں محض 135 رنز بنا کر پویلین لوٹ گئی۔
انگلینڈ کے تیز باؤلر جوش ٹنگ نے دوسری اننگز میں تباہ کن باؤلنگ کرتے ہوئے پاکستان کے ٹاپ اور مڈل آرڈر کو تہس نہس کر دیا جبکہ اولی رابنسن نے بھی بہترین باؤلنگ سے ان کا بھرپور ساتھ دیا۔ پہلی اننگز میں 171 اور دوسری اننگز میں 135 رنز بنانے کے بعد قومی ٹیم کو اننگز اور 103 رنز سے شکست کا سامنا کرنا پڑا جس کے بعد انگلینڈ نے سیریز میں فاتحانہ آغاز کر دیا ہے۔