ن لیگ نے پارٹی ٹکٹ کیلئے درخواستیں طلب کرلیں
پنجاب میں انتخابات ،حکمران جماعت مسلم لیگ ن نے امیدواروں سے پارٹی ٹکٹ کیلئے درخواستیں طلب کرلی ۔
وزیر اعظم وصدر پاکستان مسلم لیگ ن شہباز شریف نے آج ہدایات جاری کرتے ہوئے پارلیمانی بورڈز کو بھی پنجاب اور خیبرپختونخوا میں امیدواروں کی حتمی فہرستیں تیار کرنے کا حکم دیا ہے۔
امیدواروں کےنام پیغام میں شہبازشریف نے کہا کہ قائد محمد نواز شریف کی رہنمائی میں ہمیشہ ملک کو بحرانوں سے نکالا ہے، اب بھی سرخرو ہوں گے، مہنگائی میں کمی، دہشت گردی کا خاتمہ، عوام کیلئے بہترین سفری سہولیات ان کی جماعت کی پہچان ہے۔
پارٹی صدر نے امیدواروں کو ہدایت کی کہ الیکشن کمشن آف پاکستان کی طرف سے صوبہ پنجاب میں کاغذات نامزدگی کیلئے 14 مارچ کی آخری تاریخ کا اعلان ہونے کے پیش نظر اپنے اپنے حلقوں میں کاغذات جمع کرائیں۔
محمد شہباز شریف نے کہا کہ جیسے بجلی کے اندھیروں کو مٹایا، پاکستان کو معاشی قوت بنایا، ایک بار پھر یہ منزل حاصل کریں گے۔
انہوں نے کہا کہ نوجوانوں کو تعلیم، صحت اور روزگار کے مواقع دیے، لیپ ٹاپ، وظائف دیے، یہ سفر آگے بڑھائیں گے۔ انہوں نے کہا کہ ملک کو معاشی تباہی، مہنگائی اور مسائل کے عذاب میں مبتلا کرنے والوں کو عوام جانتے اور پہچانتے ہیں۔
صدر پاکستان مسلم لیگ ن نے انتخابی مہم چلانے کیلئے حکمت عملی کی تیاری کی ہدایت کر دی ہے۔ انتخابی امیدواروں کو درخواستیں جمع کروانے کیلئے 180 ایچ ماڈل ٹاؤن لاہور پارٹی کے مرکزی سیکرٹریٹ رابطہ کرنے کی بھی ہدایت کی ہے۔