پنجاب کے سرکاری اسکولوں میں اے آئی(مصنوعی ذہانت) کا مضمون لازمی قرار
حکومت پنجاب نے صوبے کے تمام سرکاری اسکولوں میں نئی ڈیجیٹل اصلاحات نافذ کرتے ہوئے مصنوعی ذہانت کو ایک لازمی مضمون کے طور پر تعلیمی نصاب میں شامل کرنے کا فیصلہ کیا ہے۔
اس اقدام کا بنیادی مقصد نئی نسل کو جدید ترین ٹیکنالوجی، بدلتے ہوئے دور کے تقاضوں اور مستقبل کی ٹیکنالوجی پر مبنی معیشت کے لیے مکمل طور پر تیار کرنا ہے۔
حکومت کے مطابق مصنوعی ذہانت کی تعلیم سے طلبہ کو نہ صرف اس جدید ٹیکنالوجی کے بنیادی تصورات اور عملی استعمال کی آگاہی حاصل ہوگی، بلکہ ان میں تنقیدی سوچ اور مسائل حل کرنے کی صلاحیتوں کو بھی فروغ ملے گا۔
اس منصوبے کو مؤثر بنانے کے لیے اسکولوں میں موجود کمپیوٹر لیبز کو جدید آلات اور سہولیات سے لیس کیا جا رہا ہے، جبکہ اساتذہ کے لیے خصوصی تربیتی پروگرامز کا انتظام بھی کیا جائے گا تاکہ وہ طلبہ کو اس مضمون کے بنیادی اصول اور مختلف شعبوں میں اس کے عملی استعمال سے بہتر انداز میں روشناس کرا سکیں۔
حکومت پنجاب کو امید ہے کہ تعلیمی نظام میں اس جدت سے صوبے بھر میں ڈیجیٹل تعلیم کے فروغ کو تقویت ملے گی اور طلبہ مستقبل کی جدید مارکیٹ کی ملازمتوں کے عین مطابق تربیت حاصل کر سکیں گے۔