قومی اسمبلی اور سینیٹ کا اجلاس 17 اگست کو طلب کرنے کا فیصلہ
حکومت نے اتحادی جماعتوں سے مشاورت مکمل کرنے کے بعد قومی اسمبلی اور سینیٹ کے اجلاس 17 اگست کو طلب کرنے کا فیصلہ کیا ہے۔ اس سلسلے میں وزارتِ پارلیمانی امور نے سمری بھیج دی ہے جس کے تحت سینیٹ کا اجلاس شام چار بجے اور قومی اسمبلی کا اجلاس شام پانچ بجے پارلیمنٹ ہاؤس اسلام آباد میں منعقد ہوگا۔
وفاقی وزیرِ پارلیمانی امور ڈاکٹر طارق فضل چوہدری کے مطابق ان اجلاسوں میں ملک کی سیاسی اور معاشی صورتِ حال کا جائزہ لیا جائے گا اور چند اہم آئینی و قانون سازی کے امور پر تبادلہ خیال کے ساتھ پیش رفت کی جائے گی۔ تمام اتحادی پارلیمانی رہنماؤں کو ان اجلاسوں میں اپنی مکمل حاضری یقینی بنانے کی ہدایت کر دی گئی ہے۔