وفاقی دارالحکومت کی حدود میں توسیع اور نئے انتظامی نظام کا منصوبہ تیار
وفاقی حکومت نے اسلام آباد کو خصوصی انتظامی حیثیت دینے اور اس کی جغرافیائی حدود میں توسیع کرنے کے منصوبے پر کام تیز کر دیا ہے۔
اس حوالے سے آئینی، قانونی اور انتظامی ماہرین جلد اپنی حتمی سفارشات وزیراعظم کو پیش کریں گے، جن کی منظوری کے بعد عملی اقدامات کا آغاز کیا جائے گا۔
ذرائع کے مطابق مجوزہ منصوبے کے تحت اسلام آباد کے جغرافیائی رقبے میں اضافہ کرتے ہوئے خیبرپختونخوا اور پنجاب کے ملحقہ علاقوں کو دارالحکومت میں شامل کرنے کی تجویز زیرِ غور ہے، جن میں ہری پور، راولپنڈی اور مری کے مخصوص حصے شامل ہیں۔
نئے مجوزہ انتظامی ماڈل کے حوالے سے ابتدائی طور پر وزیراعظم ہاؤس اور وزارت داخلہ کو کچھ تحفظات لاحق تھے، جنہیں دور کرنے کے لیے یہ فیصلہ کیا گیا ہے کہ نیا انتظامی سیٹ اپ مکمل طور پر وفاقی حکومت کے ماتحت کام کرے گا اور وفاق سے متصادم یا اس کے متوازی نہیں ہوگا۔
مجوزہ ڈھانچے کے تحت:
-
انتظامی سربراہ: نئے انتظامی یونٹ کا سربراہ میئر ہوگا، جس کا انتخاب براہِ راست کے بجائے مجوزہ اسمبلی کے ذریعے عمل میں آئے گا۔
-
مقامی اسمبلی: اس یونٹ کی اسمبلی 25 سے 30 براہِ راست منتخب اراکین پر مشتمل ہوگی۔
-
اختیارات: صحت، تعلیم اور دیگر بنیادی شہری خدمات کی فراہمی اسی نئے انتظامی یونٹ کے دائرہ کار میں شامل ہوگی۔