پی ٹی آئی لانگ مارچ: جڑواں شہروں میں تعلیمی ادارے بند اور امتحانات ملتوی
اسلام آباد کی بیشتر جامعات کا تعلیمی سرگرمیاں معطل رکھنے کا اعلان
اسلام آباد: وفاقی تعلیمی بورڈ نے پی ٹی آئی لانگ مارچ کے پیش نظر امتحانات ملتوی کرنے جبکہ اسلام آباد کی بیشتر جامعات نے بھی تعلیمی سرگرمیاں معطل رکھنے کا اعلان کیا ہے۔
ملکی سیاسی صورتحال اور تحریک انصاف کے اسلام آباد لانگ مارچ کو مدنظر رکھتے ہوئے وفاقی تعلیمی بورڈ نے 25 اور 26 مئی کو ہونے والے امتحانات ملتوی کر نے کا اعلان کردیا۔
تعلیمی بورڈ کی جانب سے جاری اعلامیے میں بتایا گیا ہے کہ ’امتحانات ناگزیر وجوہات کی بنا پر ملتوی کیے گئے جن کی نئی تاریخ کا اعلان بعد میں کیا جائے گا‘۔
علاوہ ازیں اسلام آباد کی بیشتر جامعات نے بھی سیاسی صورت حال کے پیش نظر یونیورسٹیز کو بند رکھنے کا اعلان کیا جبکہ علامہ اقبال اوپن یونیورسٹی نے بھی امتحانات ملتوی کر دیئے ہیں۔
علاوہ ازیں قائد اعظم یونیورسٹی، اسلامک انٹرنیشنل اورنیوٹیک یونیورسٹی کو بھی کل بند رکھنے کا اعلان کیا گیا ہے۔
اسپتالوں میں ایمرجنسی نافذ
دوسری جانب راولپنڈی کے اسپتالوں میں ایمرجنسی نافذ کرتے ہوئے الرٹ جاری کردیا گیا، وائس چانسلر راولپنڈی میڈیکل یونیورسٹی پروفیسر محمد عمر نے بتایا کہ تین اسپتالوں میں ایمرجنسی سروسز اپ ٹو مارک کرنے اور ادویات اور خون کی دستیابی یقینی بنانے کی ہدایت کی گئی ہیں جبکہ بینظیر بھٹو جنرل اسپتال، ہولی فیملی اسپتال اور سول اسپتال کے عملے اور ڈاکٹرز کی چھٹیاں بھی منسوخ کردی گئی ہیں۔