فاروق ستار کی شہباز شریف سے ملاقات، ملکی سیاسی صورتحال پر گفتگو
سینیئر سیاسی رہنما ڈاکٹر فاروق ستار نے قومی اسمبلی میں قائد حزب اختلاف اور مسلم لیگ (ن) کے صدر شہباز شریف سے لاہور میں ملاقات کی۔
شہباز شریف نے ڈاکٹر فاروق ستار کا خیر مقدم کیا اور ملاقات میں ملکی سیاسی و معاشی صورتحال پر غور کیا گیا۔
ملاقات میں احسن اقبال، خواجہ سعد رفیق اور سردار ایاز صادق بھی موجود تھے۔
بعدازاں میڈیا سے گفتگو میں میں فاروق ستار کا کہنا تھاکہ معیشت کا بیڑا غرق ہوچکا، منی بجٹ معیشت کے تابوت میں آخری کیل ہوگا۔
ان کا کہنا تھاکہ آج وسیع ترمفاہمت اور قومی یکجہتی کی ضرورت ہے۔
مسلم لیگ (ن) کے جنرل سیکرٹری احسن اقبال کا کہنا تھاکہ ملک کی خودمختاری کو آئی ایم ایف کے سامنے سرنڈرکردیا گیا ہے، بڑے شہروں میں مؤثربلدیاتی اداروں کا قیام ن لیگ کی ترجیح ہے۔